பி.கே.எல் தொடர் கடந்த சீசனில் சிறப்பாக செயல்பட்ட தமிழ் தலைவாஸ் அணி பயிற்சியாளர் அஷன் குமாரின் தலைமையில் முதன்முறையாக பிளேஆஃப் சுற்றுக்கு முன்னேறி அசத்தியது.10வது புரோ கபடி லீக் (பி.கே.எல்) தொடர் வருகிற டிசம்பர் 2ம் தேதி முதல் தொடங்குகிறது. ஐ.பி.எல் தொடரைப் போலவே சொந்த மைதானம் மற்றும் எதிரணியின் மைதானம் என 12 அணிகள் மோதும் இந்த தொடர் 12 நகரங்களில் நடைபெற உள்ளது.
இந்த தொடருக்கான தொடக்க ஆட்டத்தில் குஜராத் ஜெயண்ட்ஸ் தெலுங்கு டைட்டன்ஸ் அணியை எதிர்கொள்கிறது. இப்போட்டியானது குஜராத் மாநிலம் அகமதாபாத்தில் நடக்க உள்ளது.
பி.கே.எல் தொடருக்கான தமிழ் தலைவாஸ் அணி அதன் தொடக்க ஆட்டத்தில் தபாங் டெல்லி கே.சி. அணியை அகமதாபாத்தில் வருகிற டிசம்பர் 3ம் தேதி எதிர்கொள்கிறது. இந்தப் போட்டிக்காக தமிழ் தலைவாஸ் அணி வீரர்கள் பயிற்சியாளர் அஷான் குமார் தலைமையில் தீவிர பயிற்சியில் ஈடுபட்டு வருகிறார்கள்.
அரையிறுதி வரை சென்ற தமிழ் தலைவாஸ் :
தமிழகத்தின் சென்னையை தளமாகக் கொண்ட தமிழ் தலைவாஸ் அணி 5வது பி.கே.எல் தொடரில் அறிமுகமானது. அந்த சீசனில் பலத்த பின்னடைவை சந்தித்து இருந்தனர். அதன்பிறகு நடந்த நடந்த 3 சீசன்களிலும் புள்ளிகள் பட்டியலில் கடைசி இடத்தை தான் தலைவாஸ் அணி பிடித்தது. ஆனால், கடந்த சீசனில் சிறப்பாக செயல்பட்ட அணி பயிற்சியாளர் அஷன் குமாரின் தலைமையில் முதன்முறையாக பிளேஆஃப் சுற்றுக்கு முன்னேறி அசத்தியது. இருப்பினும், அரையிறுதியில் போராடி தோல்வியுற்றது.
தமிழ் தலைவாஸ் – தக்கவைக்கப்பட்ட வீரர்கள்:
இந்த சீசனில் தமிழ் தலைவாஸ் அணி இளம் வீரர்கள் மீது அதிக நம்பிக்கை வைத்துள்ளனர். ரைடர் நரேந்தர் கண்டோலா கடந்த சீசனில் சிறப்பாக செயல்பட்டு இருந்தார். காயமடைந்த பவன் செராவத்தின் இடத்தை நிரப்பிய அவர் 23 போட்டிகளில் 249 புள்ளிகளைப் பெற்றார். அண்மையில் நடந்து முடிந்த ஏலத்தில் எதிர்பார்த்தபடி, அவர் அணியிலேயே தக்கவைக்கப்பட்டார்.
இதேபோல், கேப்டனாக செயல்பட்ட சாகர் கடைசி இரண்டு சீசன்களில் அணியின் முக்கிய டிஃபன்ஸ் வீரராக இருந்துள்ளார். அவர், ஹிமான்ஷு, எம்.அபிஷேக் மற்றும் மோஹிர் ஆகியோர் அணியால் தக்கவைக்கப்பட்டனர். இதற்கிடையில், அணியின் அனுபவமிக்க ரைடர் அஜிங்க்யா பவாரும் இந்த ஆண்டு ஏலத்திற்கு முன்பே தக்கவைக்கப்பட்டார்.
தமிழ் தலைவாஸ் அணியின் உத்தேச ஆடும் 7:
நரேந்திர கண்டோல், மோஹித் ஜாகர், எம் அபிஷேக், அஜிங்க்யா பவர், செல்வமணி கே, சாஹில் குலியா மற்றும் சாகர் ரதி.
