கிரிக்கெட் உலகக் கோப்பையில் பாகிஸ்தானுக்கு எதிரான ஆட்டத்தில் ஆப்கானிஸ்தான் வரலாற்று வெற்றியைப் பெற்ற நிலையில், முன்னாள் இந்திய வீரர் இர்ஃபான் பதானுடன் ரஷித் கான் நடனமாடிய வீடியோ வைரலாகி வருகிறது.
/indian-express-tamil/media/media_files/XxFw7i8JCfvZFWd1Xtg8.jpg)
13-வது ஒருநாள் (50 ஓவர்) உலகக் கோப்பை கிரிக்கெட் திருவிழா இந்தியாவின் பல்வேறு நகரங்களில் விறுவிறுப்பாக நடைபெற்று வருகிறது. இந்த தொடரில் நேற்று திங்கள்கிழமை சென்னை சேப்பாக்கத்தில் நடைபெற்ற போட்டியில் பாகிஸ்தான் - ஆப்கானிஸ்தான் அணிகள் மோதின. மிகவும் பரபரப்பாக நடந்த இந்த ஆட்டத்தில் முதலில் பேட்டிங் செய்த பாகிஸ்தான் அணி 50 ஓவர்கள் முடிவில் 7 விக்கெட் இழப்புக்கு 282 ரன்கள் எடுத்தது.
பாகிஸ்தான் அணி தரப்பில் அதிகபட்சமாக தொடக்க வீரர் அப்துல்லா ஷபிக் 58 ரன்கள் எடுத்தார். ஆப்கானிஸ்தான் அணியில் அதிகபட்சமாக நூர் அகமது 3 விக்கெட்டுகளை கைப்பற்றினார். தொடர்ந்து 283 ரன்கள் கொண்ட வெற்றி இலக்கை துரத்திய ஆப்கானிஸ்தான் 2 விக்கெட்டுகளை மட்டும் இழந்து 49 ஓவர்கள் முடிவில் வெற்றி இலக்கை எட்டிப்பிடித்தது.
அந்த அணிக்கு சிறப்பான தொடக்கம் கொடுத்த தொடக்க வீரர்களான ரஹ்மானுல்லா குர்பாஸ் 65 ரன்களும், இப்ராஹிம் சத்ரான் 87 ரன்களும் எடுத்தார். கடைசி வரை களத்தில் இருந்து அணியை வெற்றிக்கு அழைத்துச் சென்ற ரஹ்மத் ஷா 77 ரன்களும், கேப்டன் ஹெஷ்மத்துல்லா ஷாஹிதி 48 ரன்களும் எடுத்தனர். இறுதியில் பாகிஸ்தானை 8 விக்கெட்டுகள் வித்தியாசத்தில் வீழ்த்தி ஆப்கானிஸ்தான் வரலாறு படைத்தது.
வீடியோ வைரல்
இந்நிலையில், இந்த வெற்றிக்கு பின்னர் ஆப்கானிஸ்தான் வீரர் ரஷீத் கான் இந்திய முன்னாள் வீரர் இர்பான் பதானுடன் இணைந்து நடனமாடி வெற்றியை கொண்டாடினார். இந்த வீடியோ சமூகவலைதளங்களில் பதிவிட்டப்பட்ட நிலையில், கிரிக்கெட் ரசிகர்கள் மத்தியில் அதிகம் பகிரப்பட்ட தற்போது வைரலாகி வருகிறது.
