10-வது புரோ கபடி லீக் திருவிழா கடந்த 2ம் தேதி தொடங்கி இந்தியாவில் விறுவிறுப்பாக நடந்து வருகிறது. இந்த தொடரில் பெங்கால் வாரியர்ஸ், பெங்களூரு புல்ஸ், தபாங் டெல்லி, குஜராத் ஜெயன்ட்ஸ், அரியானா ஸ்டீலர்ஸ், ஜெய்ப்பூர் பிங்க் பாந்தர்ஸ், பாட்னா பைரேட்ஸ், புனேரி பால்டன், தமிழ் தலைவாஸ், தெலுங்கு டைட்டன்ஸ், யு மும்பா மற்றும் உ.பி. யோத்தாஸ் ஆகிய 12 அணிகள் களமாடி வருகின்றன.
இந்நிலையில் இந்த தொடரில் இன்று 2 லீக் ஆட்டம் நடைபெற உள்ளது. அதில், பாட்னாவில் உள்ள பாட்லிபுத்ரா உள்விளையாட்டு அரங்கத்தில் இரவு 8 மணிக்கு தொடங்கும் முதலாவது ஆட்டத்தில் ஜெய்ப்பூர் பிங்க் பாந்தர்ஸ் - பெங்களூரு புல்ஸ் அணிகள் மோதுகின்றன. இதனைத் தொடர்ந்து, இன்று இரவு 9 மணிக்கு நடைபெறும் மற்றொரு லீக் ஆட்டத்தில் தமிழ் தலைவாஸ் - யு மும்பா அணிகள் மோத உள்ளன.
நடப்பு புரோ கபடி தொடரில் தமிழ் தலைவாஸ் அணி இதுவரை விளையாடியுள்ள 15 போட்டிகளில் 6ல் வெற்றி, 9ல் தோல்வி என 35 புள்ளிகளுடன் புள்ளிகள் பட்டியலில் 10வது இடத்தில் உள்ளது.தமிழ் தலைவாஸ் அணி பிளே-ஆஃப்க்கு முன்னேற முதல் 6 இடங்களுக்குள் வர வேண்டும். அதற்கு தமிழ் தலைவாஸ் அணி இன்னும் இரண்டு போட்டிகளில் தொடர்ந்து வெற்றி பெற வேண்டும். எனவே, இவ்விரு அணிகள் மோதும் இன்றைய ஆட்டத்தில் பரபரப்புக்கு பஞ்சமிருக்காது.
