திமுக எம்.எல்.ஏ மகன் மற்றும் மருமகள் மீது வன்கொடுமை தடுப்புச் சட்டத்தின் கீழ் வழக்குப்பதிவு செய்யப்பட்டுள்ளது.

திமுக எம்.எல்.ஏ மகன் வீட்டில் பட்டியலினப் பெண் கொடுமைப்படுத்த விவகாரத்தை கண்டித்து பிப்.1ஆம் தேதி அதிமுக ஆர்ப்பாட்டம் அறிவித்துள்ளது. இந்த விவகாரத்தில் பல்லாவரம் எம்.எல்.ஏ கருணாநிதியின் மகனும், மருமகளும் தலைமறைவாக உள்ளனர். 

சென்னை பல்லாவரம் சட்டமன்ற தொகுதி திமுக எம்.எல்.ஏ கருணாநிதி. இவரின் மகன் ஆண்டோ மதிவாணன். இவரின் மனைவி மெர்லினா. இவர்கள் திருவான்மியூரில் வசித்து வந்தனர்.இவர்களின் வீட்டில் பணி பெண்ணாக பட்டியல் இனத்தைச் சேர்ந்த பெண் ஒருவர் பணி செய்து வந்துள்ளார். அவர் காவல் நிலையத்தில் அளித்த புகாரில், “தனது தாயைப் பார்க்க வேண்டும் என்று கேட்ட பெண்ணை நிர்வாணமாக்கி கொடுமைப்படுத்தி உள்ளனர். படுக்க வைத்து பிறப்புறுப்பில் மிதித்துள்ளனர். மேலும் ஜாதி பெயரை கூறி அப்பெண்ணை தாக்கியுள்ளனர்” என முதல் தகவல் அறிக்கை பதியப்பட்டுள்ளது.

இந்த விவகாரத்தில் ஆண்டோ மதிவாணன் மற்றும் அவரின் மனைவி மெர்லினா ஆகியோர் மீது வன்கொடுமை தடுப்புச் சட்டத்தின் கீழ் வழக்குப்பதிவு செய்யப்பட்டுள்ளது.இந்த நிலையில், ஆண்டோ மற்றும் மெர்லினா தலைமறைவாகி விட்டனர். அவர்களை கைது செய்ய 3 தனிப்படைகள் அமைக்கப்பட்டுள்ளன.இதற்கிடையில், அவர்கள் சரணடையும் பட்சத்தில் சட்டப்படி அவர்களுக்கு ஜாமின் அளிக்க பரிசீலிக்க வேண்டும் என சென்னை உயர் நீதிமன்றம் கூறியுள்ளது.